“नायकसँगै सिनेमा हेर्दा”

जगिरको खोजीमा निस्केको युवकको प्रमाणपत्र फाइल खोसिएपछि युवक झस्कन्छ । लुटेरा खोज्न प्रहरी निरीक्षकको पोसाकमा युवक चमत्कारिक रूपमा पर्दामा देखा पर्छ । दर्शक ताली पिट्छन् । खेदाउने क्रममा उसलाई पनि गुन्डाले खेद्छन् । अनि सुरु हुन्छ- खतरनाक स्टन्ट । विराटनगरको इन्द्र चलचित्र मन्दिरमा शनिबारसँगै बसेर चलचित्र हेर्दै गरेका नायक निखिल उप्रेतीलाई पछाडि बसेका दर्शक भन्दै थिए, ‘दाइ यस्तो खतरनाक सट साँच्चै हो ?’ जम्प गरेर लामो फर्लाङ मारेको र ‘फ्लाइङ किक’ हिर्काएको द्वन्द्वको दृश्य रमाइलो माने पनि दर्शक अपत्यारिलो मानिरहेका थिए ।

निखिलसँगै नायक सुनिलदत्त पाण्डे, पुष्प श्रेष्ठ र विष्णु सापकोटाले सिनेमा सुरु हुनुअघि पर्दा अगाडि उभिएर दर्शकलाई सम्बोधन गरेका थिए । त्यसपछि सँगै बसेर चलचित्र पनि हेरे । बेलाबेला उप्रेतीको अटोग्राफ माग्न उर्लने भीड थाम्न सिने हलका कर्मचारीलाई गाह्रो भइरहेको थियो । आफैंै कथा तयार पारेर अभिनयमात्र होइन ‘सावधान’ नामक चलचित्र निर्माणका लागि लगानीसमेत गरेका उप्रेतीले प्रदर्शनको स्थिति हेर्न भ्रमणमा निस्केको बताए ।

सावधानमा यस्ता पनि दृश्य छन् जो हिन्दी फिल्ममा पनि प्रयोग भएका छैनन्, उनले भने, ‘सकेसम्म स्तरीय सिनेमा दिनेे प्रयास हो, पुगेका ठाउँमा दर्शकले मन पराइरहेको पाइयो ।’ बेरोजगारीले युवालाई गाँजेपछि पछि त्यसले ठूलो रूप लिने देखाइएको कथावस्तु रहेको सावधानका विषयमा उनले भने, ‘सरकारले ध्यान दिनुपर्ने समस्यालाई हामीले देखाउने प्रयास गरेका छौं । मुलुकका सात सहरमा एकैसाथ प्रदर्शन भइरहेको चलचित्रले आशातीत दर्शक पाएको उनले सुनाए । ‘अहिलेसम्म २५/२६ वटा फिल्म खेलियो, लगानी गरेर बनाएको यो पहिलो हो,’ उनले भने, ‘हामीलाई अझै सन्तुष्टि छैन, नेपाली सबैखाले दर्शक समेट्ने सिनेमा बनाउन प्रयास जारी छ ।